Oppgradering av sandkasse

Ein sosial sandkasse – sitjeplassar for små og store Me ønskjer å oppgradera sandkassen på leikeplassen i burettslaget med ei solid treramme og tilstøytande benkar. Målet er å gjera området til ein meir innbydande møteplass, der barn kan leika og utforska medan foreldre, besteforeldre og andre naboar kan setja seg ned, følgja med og slå av ein prat. Burettslaget vårt har mykje dugnadsvilje og eit sterkt ønske om å skapa gode fellesområde. I Sandkassen kan barn leika kreativt på tvers av alder. Barna kan grava, byggja, samarbeida og finna på eigne leikar. Med gode sitjeplassar tett på vil det bli lettare for vaksne å bli verande ute og delta i fellesskapet. Benkane skal også vera til glede for naboar som ønskjer ein liten pause og kontakt med andre. Prosjektet går ut på klargjering av området, bygging av ei ny ramme rundt sandkassen og to stabile benkar langs sidene. Me ser føre oss ein sandkasse på om lag tre gonger tre meter. Benkane skal ha ei behageleg sitjehøgd for vaksne og plasserast slik at barna framleis har god tilgang til sanden. Endelege mål blir tilpassa området før me kjøper inn og kappar materialane. Me vil nytta trevirke som eignar seg til utandørs bruk, og festemiddel som toler vêr og fukt. Ramma og benkane skal få solide samanføyingar og god understøtting. Alle tilgjengelege kantar og flater blir slipa, og skruene blir senka ned slik at overflatene blir gode å ta på. Treverket skal haldast unna direkte jordkontakt. Arbeidet blir gjennomført på dugnad av bebuarane. Me vil samarbeida om oppmåling, innkjøp, klargjering, bygging og rydding. Burettslaget tek ansvar for jamleg tilsyn og vedlikehald etterpå. Me søkjer jem & fix om støtte til materialane som trengst for å byggja ramma og benkane. Med ein avgrensa materialinnsats og vår eigen arbeidsinnsats kan me skapa ein varig møteplass med låg terskel for å delta. Me håpar oppgraderinga vil gi fleire gode kvardagsmøte, meir uteleik og eit sterkare fellesskap mellom små og store